عودة موسم الفود ترك

الفود تركّات موجودة طول السنة، ليش تحديدًا إذا زان الجوّ ترجع تزدحم وتمتلي الشوارع سيّارات صافين طابور؟

عندنا نظرية: الفود ترك هي الخيار الأكمل للعشاء الثاني، وفي الجوّ الزين يزين العشاء الثاني لأن الليل طويل، والخيارات في الشارع كثير، وعلى قولة الشاعر: كل ما نسنس في الليل جوع، وقّفت عند فود ترك.

الحين زان الجو، ورجع موسم الفود ترك، موسم العشاء الثاني اللي يخلّيك سعيد، شبعان، ومستحيل تفكّر بعشاء ثالث. 

في هذي اللستة جمّعنا عدّة فود تركّات ننصح فيها في مدينة الرياض، رحنا جرّبناها، وجازت لنا، وقررنا نتكلم عنها.

قبل ما نكتب اللستة كان عندنا تحدّي: وش نسمّيها؟ فود ترك؟ وين #تحدّث_العربية؟ ليه ما نسمّيها شاحنة الطعام؟ ليه ما نسمّي المنيو قائمة طعام؟ أو الدبل شت اسبريسو طلقة مضاعفة؟ قررنا عشان ما نصير ماصلين ونكتبها زيّ ما نقولها: فود ترك.

شارك هذي اللستة لأحد ودك تجرّب الفود ترك معه على واتساب!

الفود ترك الأول - سموكر

أوّل ما سمعنا عن قصّة الفود ترك هذي حسّينا انه فيه شيء غلط: تدخين اللحوم شيء معقّد، ويأخذ وقت، كيف بيقدّم، ويحضّر داخل فود ترك؟ مهمة شبه مستحيلة لكن القائمين على فود ترك سموكر قدروا عليها. 

برايم بلاك انجوس بريسكت، قد يكون من أفضل أطباق مطاعم الرياض، مب بس كـ فود ترك، طلب يخلّيك تتمنى تكون قطوة شارع في الحديقة اللي موجودة فيها هذي الفود ترك.

‎ 

يمكن يتأخر عليك الطلب شوي، ويمكن تمر جنب الترك ما تلاحظ انه مفتوح، لكن الأكيد: إذا طلبت من عندهم ما راح تندم أبدًا. 

حاليًا موقعه في حيّ القيروان، شمال الرياض.

الفود ترك الثاني - سبشل هُت دوق

اسمه سبشل هُت دوق، بس هل فيه شيء سبيشال؟ في الحقيقة.. لا. هذا الفود ترك كأنه محل تسالي صغير جدًا، ومتنقل، ويهتم جدًا بالتجربة: يعطيك قفازات عشان ما تحوس نفسك أو سيارتك.

القائمين على الفود ترك محترمين جدًا، وكريمين جدًا.. ويعطونك خياراتهم: بخبزّة صامولي طرية أو تورتيلا شهيّة عند هذا الترك طُرق مختلفة تقدر تأكل فيها الهوت دوق، وإذا ما تبي خبز تقدر تأكل الهوت دوق مرة واحدة من السيخ مباشرة.

حاليًا موقعه في شارع الحسين ابن علي في حيّ الإزدهار.

الفود ترك الثالث - منسف عبّود

وش دعوة عاد؟ فود ترك منسف. ليه؟ وش الله حادكم؟ طمّنا واحد من الشركاء وتكلّم عن طريقتهم لتحضير المنسف: هو فعليًا شغل بيت، يحضرون في البيت اللي يبعد ١٠ دقايق عن الفود ترك.

‎ 

بدأت الفكرة لمّا جرّب واحد من طلّاب اللغة الصينية في جامعة الملك سعود بتجربة طبق المنسف في منزل شريكه الأردني، وتحوّلت هذي التجربة لهوس جديد خلّاه يسافر للأردن يجرب مطاعم مختلفة ويستورد سرّهم الأهم اللي يخلّي منسفهم ممتاز: الجميد الكركي، من منطقة كرك في الأردن المشهورة بأفضل جميد.

‎ 

برضو، عند منسف عبود قهوة العميد المعروفة في الأردن، اللي تقدّم بكوب العميد بعد.

يمديك وأنت في السيارة تقول لمحمود، موظف الفود ترك اللي معهم منذ افتتاحهم من سنة، 🤞🤏👉👍، وبيجبلك قهوة سكر وسط يحبها قلبك.

الفود ترك الرابع - فَنْكي

الشيف رنا هاوية للطبخ منذ الصغر، وعندها فود تركات مختلفة ومنوعة، وكل ما ضبطت وصفة وجازت لها أكلة حولتها لفود ترك. 

فَنكي هو آخر تركاتها عمره ما تجاوز الستة شهور.

‎ 

هذا الفود ترك هو فود ترك مقبّلات بإمتياز. تعرف الطبق اللي تحبه في فرايديز؟ أو الطبق اللي مخلي تشيليز للحين فاتح؟ أو الشيء الوحيد المميز عند فدركرز؟ هذا الفود ترك يقدّمهم كلهم مرّه وحده.

موقعه في حديقة النخيل، حيّ النخيل، جنب النخيل.

يستحق الذكر: داش فود

‎ 

فود ترك مبتكر يسوّي ساندويتشات تشباتي بالدجاج المقلي ويقدّمها بثلاثة نكهات: الباربكيو، البافلو، والسيراتشا. 

وتراه قريب من فود ترك فنكي.

شكرًا لكم، كان هذا عدد جديد من منتج لستة من كلماشي.

ودّك تذوق اقتراحاتنا؟ شيّك هذه القائمة على جوجل مابز! ولا تنسى تشارك اللستة في قروب العائلة.