مطاعم ما اجتهدت

لو تمشي بأحد شوارع الرياض بتلاحظ شيء: المنافسة بين المطاعم كبيرة، كل مطعم يحاول يبهرك بأسمه، وهويته البصرية، ولوحته. بس فيه مطاعم قررت تترك الأمور هذي، وتركّز على أهم شيء عندهم: الأكل.

في لستة مطاعم ما اجتهدت، بنتكلم عن هذي المطاعم اللي بدّت المضمون على الشكل.. واجتهدت في الأشياء اللي تهم جدًا.. منتجهم.

كون المطعم ما اجتهد بلوحته وهويته ما يعني انه سيء، على العكس، قد يعني انه مميّز بأكله، وزيّ ما هذي المطاعم ما اجتهدت، حنّا ما اجتهدنا في هذي اللستة.. اخترنا لك ثلاثة مطاعم بس في مدينة الرياض.

المطعم الأول - طريق الأطعمة

فيه نوع شاورما جديدة اكتسب شهرة كبيرة في مدينة الرياض، وهو شاورما العربي بخبز الصاج الأحمر. 

هذا المطعم ضبطه وقدّمه بأفضل شكل ممكن: شاورما أروق من رايق، أعجب من عجيبة، وأذوق من ذوق المذاق

نتخيّل اننا جزء من جلسة العصف الذهني لتسمية هذا المطعم، الفكرة كانت كالتالي: هذا المطعم على الطريق، ويبيع أطعمة.. ليه ما نسمّيه: طريق الأطعمة؟

اجتهد هذا المطعم، وحط إشارة مرور تحت لوحة موقعه في طريق الثمامة، لكن مسرع ما البلدية أزالتها. لا يفوتكم البروستد من عندهم بعد! 

المطعم الثاني - درة المكونات

اشتغل فرزان حسين سنوات عديدة في منتجع سياحي في سريلانكا تحت إدارة فريق عمل ايطالي، اكتسب منهم خبرة وعرف وشلون يضبط بيتزا نابولي على أصولها. سافر فرزان اللين ماجا لنا في حيّ السويدي، مدينة الرياض.

مطعم درة المكونات بسيط بإسمه معقّد بمكوناته، عنده بيتزا نابولي لذيذة جدًا، وتستغرب انك تلقى مطعم زيّه بجوار مطاعم التسالي المشهورة في السويدي. 

المطعم مجتهد جدًا، فرنه الجميل مصنّع في السعودية، ومكوناتهم مستوردة من ايطاليا. يوم قلنا لهم عن فكرة اللستة تحسسوا شوي وقالوا لنا عن خطتهم لتغيير اسمهم في ٢٠٢٦: مطعم اكسبو الرياض! الحمدالله ان بيتزتهم لذيذة.

المطعم الثالث - مصقعة وسلطة

من ابتكارات المشهورة رنا القفاري، أو المعروفة بإسم: رنا هانم. مطعم مصقعة وسلطة هو وسيلتك الأولى اذا مشتهي أكل بيت بسرعة. 

يقدمون المصقعة مع رز بيت بطريقة مختلفة: مصقعتهم زيّ صبواي، تقدر تختار اللي فيها على كيفك، أو كيف بطنك.

رنا عندها عادة غريبة بأسامي الشركات: تحب تختصر وتكون واضحة جدًا، زيّ شركتها، حالي ومالح، ومطاعمها: مصقعة وسلطة، أو جريش وتمّن.. هذي مب المنيو، هذا اسم المطعم.

للمطعم أربعة فروع في مدينة الرياض، وداخل المنيو يبيعون شيئين: مصقعة وسلطة، ننصحك بمصقعة الدجاج مع الرز، وسلطة سلطتنا اللذيذة.

شكرًا لكم، كان هذا العدد الجديد من منتج لستة من كلماشي.

تبي تزور مطاعم اللستة؟ شيّكها من هالقائمة!