مطعم أوڤن

وعد ما راح نتكلم عن شوال في هذي النشرة. الشهر خلّص على خير، وسمعنا كل نسخة ابتُكرت من نفس النكتة. الحمد لله إن صفحات مواقع التواصل الاجتماعي امتلت بترند بديل: موظفين السفارة السعودية، الله يخليهم لنا.

ضاع جوازك؟ يرجعونك السعودية. 

طفت الكهرباء في البرتغال؟ استخدم انترنت السفارة.

ما تدري وين تاكل؟ هذي حنّا بنخدمك فيها؛ اخترنا لك مطعم الأسبوع!

ملاحظة: إذا كنت من محبين نشرة مطعم الأسبوع اقرأ النشرة لآخرها، عندنا خبر لك.

‎ 

‎ 

‎ 

‎ 

مطعمنا لهذا الأسبوع (أوفن) طابعه ومسماه الفرني يوحي لك أنه محل فطاير بس، لكن بالواقع يقدّم فطاير ومأكولات لبنانية تقليدية، متمدنة في أساليب الطهي. فما راح يحرمونك من النكهات اللي تحبها في الطهي اللبناني

الفكرة بدت في لبنان كمخبز -للأسف- فارق الحياة، بس خلدوا ذاكرته بافتتاح مطعم بالرياض بمنيو جديد من تطوير الشيف أحمد بريربي و آلان جعام الحاصل على نجمة ميشلين في فرنسا. طبقوا أحمد وآلان خبرتهم في الأكل اللبناني مع تقنيات عالمية عشان يبتكرون أطباق للسوق السعودي.

‎ 

فيه مطاعم تصميمها ما يشبهها، بس أوفن مب منها. الطوب المكشوف في زوايا المكان يتمازج مع كل التفاصيل الثانية، فعلًا تحسّ أنك سافرت للضيعة. من لحظة ما يستقبلونك تشيل همّ كم مرة بتقول لكم "شكرًا، يعطيك العافية" على شيلتهم لك وخصوصًا النادل يحيى.

بالنسبة للأكل، فهو بجودة تضمن أنه يرضي كل أفراد العائلة، وإذا ما اتفقتوا على أطباق رئيسية، أقلهّا تشاركوا مَزّاتهم الباردة والحارة وطبعًا الضيافة اللي تنزل على كل طاولة، وهي عبارة عن: هريس الباذنجان والطماطم المشوية مع السمسم، زيت الزيتون والعسل. وإذا ما زلتوا محتارين بالأطباق، ننصح بالطلبات اللي بنقترحها بالفقرة الجايّة.

الحمّص الأسود

حمّص لذيذ رغم غرابة لونه. وش اللي يعطيه اللون الأسود؟ طحينة سوداء من حبة البركة. مع أن لو بنستقعد شوي، لونه أقرب للرمادي.. بس مو هذي سالفتنا. أهم شي لا تنتظر باقي الأكل، كله أول ما يجيك مع الخبز وهو حار.

سلطة أوڤن

هذي السلطة من ابتكاراتهم الرهيبة، مفعمة بالنكهات بدون ما تصير دسمة. وهي عبارة عن سلطة خضراء بالطماطم، حشوة المكدوس، و لبنة وجوز بالعسل. معلومة جانبية: يجيبون مكدوسهم من جيرانهم بالسليمانية.

طاووق بالبستو

أحد الأطباق اللي أضافوا لها لمسة عصرية، بس الحلو أنه ما طغى على نكهة الطاووق المشوية اللي نحبها، والريحان أضاف لمسة عطرية رائعة. هذا الطبق يتكوّن من سيخين شيش طاووق متبلّة بالبستو. يقدم مع خبز الصاج، البطاطس المقلية وصلصة ثوم عادية وثانية بالبستو -هذي لا تفوتكم-.

إلى من يهمّه الأمر 📣

تعودت يصلك إشعار رسالة بريديّة من كلماشي في التاسعة والربع صباحًا من كل يوم خميس؟ 

عندنا لك خبر حزين: هذا آخر عدد من نشرة مطعم الأسبوع بننشرها حتّى إشعارٍ آخر.

استمتعنا بالحديث عن مطاعمنا المفضلة وأحدث مطاعم مدينة الرياض. قدّ جرّبت أحد المطاعم اللي كتبنا عنها؟ اكتب لنا عن تجربتك هنا. 

بس ترى فيه خبر سعيد: بنرجع لكم بمحتوى مكتوب حبّيتوه وكان أساسنا في بدايات كلماشي... خلّوكم قريبين!